Advokat Aleksandar Olenik iz pravnog tima Lige socijaldemokrata Vojvodine (LSV) kaže da će već sutra biti podnesene prve tužbe protiv države Srbije i odgovornih za korištenje zabranjenog oružja protiv mirnih demonstranata.
Kako je kazao Olenik, javilo mu se već 20 građana koji su zatražili pravnu pomoć.
“Svi građani koji su bili izloženi dejstvu zvučnog topa u ulici kralja Milana, a koji osjete mučninu, glavobolju, povraćaju i dezorijentisani su, treba odmah da se jave ljekaru i zatraže stručnu pomoć. Ti simptomi su posljedica dejstva zvučnog topa i to može biti opasno ako se ne liječi. Problem je što mnogi ljudi ni ne znaju šta im se zapravo dogodilo. Upravo mi se javio bračni par koji se našao u ulici kralja Milana kada je korišten zvučni top. Oboje su se probudili oko tri sata poslije ponoći sa istim simptomima. Muškarac je pritom povrijeđen jer je pao preko žardinjere. Ima mnogo takvih povreda. Ljudi su počeli da se javljaju od jutros, broj raste bukvalno iz sata u sat i do sada nam se javilo skoro 20 povrijeđenih građana”, objašnjava Olenik.
Prema njegovim riječima, počinjen je težak zločin i ozbiljno krivično djelo, jer je oružje koje nije dozvoljeno, upotrebljeno protiv građana koji su mirno protestovali.
“Treba procesuirati one koji su naredili, organizovali i koristili takvu vrstu oružja koje je kod nas zabranjeno. U pitanju je neselektivno oružje koje nanosi povrede svima. Ovog puta su žrtve bile građani koji su mirno protestovali, nisu napadali ni policiju ni zgrade u kojima se nalaze institucije, niti ugrožavali bilo čiju bezbijednost na bilo koji način. Ovo nije ratni zločin, jer ne postoje dve zaraćene strane, s jedne strane su mirni građani, s druge strane režim, ali jeste veliki zločin”, kaže advokat Olenik.
